ازاي تكسب فلوس من الثري دي ماكس

هنتكلم بالتفاصيل عن الطرق المختلفة اللي تخليك تكسب ماديا من الماكس في المجال المعماري ، و هتعرف ازاي تقدر تشتغل من خلال الثري دي ماكس و يكون مصدر دخل ليك و ازاي تبقي فاهم كويس اوي ايه هيا القيمة اللي تقدر تقدمها باستخدام البرنامج، وايه هيا المجالات الي هتقدر تنافس فيها  وايه هيا اشكال البيزنس الي ممكن تستفيد من القيمة الي بتقدمها.

المقدمة

كيفية الربح من تصاميم ال 3d

مبدئيا لازم تفهم ان الماكس هو إداة رسم، أي خدمة هتقدمها باستخدام الماكس وحده هتكون رسم فقط

و عملية الرسم بتدخل في صناعات وقطاعات كتير  و بشكل عام  بتشمل مرحلتين:

  • إعداد المنتجات وتصميمها و تطويرها
  • مرحلة التقديم النهائي للعميل و الأظهار المعماري

فأنت لازم تفهم طبيعة دورك في كل مرحلة من المرحلتين :

  • يكون دورك تشتغل علي عملية التصميم نفسها و بالتالي هتقوم بمساعدة المصمم في تنفيذ التصميم بأفضل صورة ممكنة
  • أو انك تكون بتشتغل علي المرحلة النهائية و مرحلة التقديم النهائي أو الأظهار المعماري و هنا هيكون دورك تساعد العميل أنه يفهم المشروع بشكل كويس من خلال تقديم المشروع بأفضل صورة ممكنة

المهم متضيعش وقت و مجهود في حاجات مش مهمة أو أساسية، لأن مجال الثري دي مجال واسع لازم تبقي فاهم متطلبات الشغلانة اللي داخل عليها بالظبط عشان تديلها علي قد المطلوب و تطور فيه.

يعني متكونش تعمل او تضيف حاجة زيادة و تبذل فيها وقت و جهد كبير جدا و في الاخر هي مش مطلوبة او مش اساسية او مش هتفرق كتير في جودة المنتج النهائي

 

أول حاجة أفهم كويس جدا ايه المطلوب منك و أزاي تقدم المطلوب بأعلي جودة و في اقل وقت

تخصصات تعمل فلوس من الماكس في المجال المعماري

كيفية الربح من تصاميم ال 3d

1- المناظير الخارجية و الداخلية

الماكس المعماري بيستخدم في حاجات كتير جدا علي رأسها رسومات المناظير سواء الخارجية و الداخلية

  • المناظير الداخلية بتساعد علي فهم الفراغ الموجود بفرشه بالوانه و ازاي الشخص هيستخدم الفراغ الداخلي ده
  • المناظير الخارجية بتوضح شكل المباني من بره و الواجهات و الفتحات و علاقته بالبيئة اللي حواليه

وبطبيعة الحال شغل المناظير الداخلية متوفر أكتر لان مثلا العمارة فيها 10 أدوار كل دور فيه شقتين كل شقة فيها 3 او 4 غرف، احسب كل دول و هيطلعك عدد كبير من الغرف اللي كل واحد منهم محتاجة تصميم داخلي.

2- الأنيميشن

حاجة كمان مهمة و بتطلب في المجال المعماري و هي الأنيميشن، الطلب عليها يعتبر قليل لكن سعرها غالي، و هي مش صعبة إنك تتعلمها و تقدر تعملها بمنتهي السهولة لو فهمت و مشيت وراء الأسس و القواعد الخاصة بالأنميشن.

3- المساقط الافقية ثلاثية الابعاد

و في بعض الحاجات التانية اللي بتتطلب في الماكس و هي المساقط الافقية ثلاثية الابعاد، و الخدمة ديه بتتطلب أكتر من شركات التسويق العقاري عشان تقدر تسوق المشروعات بتاعتها للناس و يقدروا يفهموا مشروعاتها العقارية بسهولة.

4- الموديلنج أو المجسمات

و من الحاجات التانية اللي بتتطلب هي ان الموديلنج او المجسمات تتبني لوحدها بشكل مسبق و بعدين يتطلب منك عمل أخراج نهائي لها، فأنت ممكن مبتدأش المشروع من الاول و يجيلك المشروع جاهز إلي حد ما و تكمل عليه و تعمله الشكل النهائي في أفضل صورة ممكنة.

أشكال البيزنس تعملها من خلال الماكس

كيفية الربح من تصاميم ال 3d

فريلانس

اول طريقة تتعامل بيها مع العملاء بتوعك هي كفريلانسر ، يعني بالقطعة زي ما بنقول لو العميل عنده مشروع بيعرضه عليك و انت بتديله السعر بتاعك و لو وافق بتبدأ معاه و مميزاته تتعتبر واضحة زي الحرية و انت مدير نفسك و التعامل مع عدد اكبر من العملاء في نفس الوقت. لكن لازم نأخد بالنا من مسئولياتها لانها تعتبر أكبر عيوبها زي 

بيكون عليك ضغط كبير و بتتحمل مسئولية تنظيم الوقت و المشروعات.

دوام كامل في شركة

تتقدر تشتغل كموظف بدوام كامل من خلال إنك تبدأ تقدم في الشركات اللي طالبة ناس و فاتحة باب التوظيف، و ديه تعتبر خطوة مهمة و فعالة بالأخص لو لسه بتبتدئ لأنك هتكتسب خبرة كويسة و مفيهاش مخاطرة زي الشغل الحر.

تأسس شركتك الخاصة

الطريقة التالتة أنك تاسس شركتك او مكتب الخاص بك، و تبتدي تكون فريق متكامل يكمل معاك الشغل و تبني سيستم متكامل يدير الفريق و المكتب.

لكن قبل الخطوة ديه لازم يكون عندك الخبرة الكافية في الادارة فضلا عن الخبرة التنقية. فلازم تكون عندك فهم بعلوم الإدارة بشكل كبير عشان تعرف تدير البيزنس بكفاءة.

المتطلبات اللازمة عشان تبدأ

كيفية الربح من تصاميم ال 3d

بورتفليو قوي

اول حاجة و أهم حاجة أنك محتاج بورتفليو قوي، يعني محتاج يكون عندك سابقة أعمال قوية. لو معندكش سابقة أعمال، اشتغل مع نفسك علي مشروعات تطور نفسك بيها و تضيف المميز لسابقة أعمالك.

لازم تبني سابقة أعمالك و متقدمش في شركة بسيرة الذاتية فقط و متعرضش شغلك بكلام و وعود بس. بناء سابقة الأعمال هو الأساس. و كل ما تبني سابقة أعمال أكبر و أقوي كل ما يجيلك شغل أكبر.

ترفع شغلك اونلاين باستمرار

انشأ حساب علي موقع بيهانس و أرفع شغلك عليه و بعد كده تعمل صفحة فيسبوك و قناة يوتيوب وترفع عليهم شغلك باستمرار. و انشر شغلك في كل مكان علي قد ما تقدر.

ساعد الناس علي جروبات فيسبوك

المجال المعماري ليه جروبات كتير علي الفيسبوك ادخل شوف المشاكل اللي بتقابل الناس و ساعدهم. و حط مشاريعك و عرفهم هي بتتعمل ازاي . اعمل فيديو من صور شغلك و ارفعه علي قناتك علي اليوتيوب.

اعمل خطة تسعير مناسبة لشغلك

قيم الوقت بتاعك و حطله سعر و لما يطلب منك شغل، تحسب الشغل هيأخد منك وقت قد ايه و بناء عليه تحدد السعر النهائي. و كل لما شغلك يطور و الطلب عليك يزيد، تقدر تزود السعر بتاعك مع الوقت

الملخص

 ذكرنا أهمية أنك متضيعش وقت و مجهود في حاجات مش مهمة أو أساسية و ركز في المطلوب بس و طور فيه. كمان ذكرنا التخصصات المختلفة في الماكس المعماري و أشكال البيزنس المختلفة اللي تقدر تعملها من خلال الماكس. و المتطلبات اللازمة عشان تبدأ و اللي أهمها بناء بورتفليو قوي. و برده متنساش قوة التعليم الأونلاين لأنه بيقدملك ميزة تنوع المصادر التعليمية.

اعرف اكتر عن برنامج تأسيس المعماريين وابدأ طور من نفسك