ما هي بلانويا ؟!

اذا كنت عاوز تعرف ايه هيا بلانويا وايه قصتها فانت في المكان الصح – كمل قراءه واتعرف علينا اكتر بدانا منين ورايحين فين وايه هيا اهدافنا

قصة بلانويا

القصة عن لسان م/ محمد الدجلة مؤسس منصة بلانويا

بلانويا بدات معايا تقريبا ما بين 2015 و 2016 لما كنت بستغرب جدا في شغلي كمعيد في الجامعة هوا احنا ليه بنكتفي فعلا بالحد الادني الي بنقدمه في التعليم لاخواتنا الطلبة مع اننا نقدر نقدم اكتر من كدا بكتير لية معظم الامور بتعدي لمجرد ان شكلها حلو ولكنها في الاساس مفرغه من مضمونها ومبتضيفش أي قيمة حقيقية

وكنت بشوف انه من مسؤوليتنا وواجباتنا الاساسية اننا نقدم افضل حاجة نقدر نقدمها بأفضل شكل نقدر نعمله وبأعلى جوده نقدر عليها ولكن للاسف النظام الاكاديمي التقليدي في جامعاتنا ليه اسقف كتير اوي مينفعش تتخطاها وعوائق وعقبات سخيفة جدا قدام اي فكر جديد واي رغبه حقيقية في التطوير

عشان كدا سبت الجامعة – قدمت استقالتي ومشيت لانه كان لازم اكون صادق مع نفسي انه لو عاوز اعلم الناس فعلا يبأه لازم اعلمهم بجد تعليم حقيقي محترم يضيف ليهم فعلا قيمة كبيرة ويأثر في حياتهم كلها ويساعدهم يتقدموا ويتطورا ويكونو اشخاص وكيانات فاعلة في المجتمع بتسيب اثر كبير وبتساعدنا فعلا كلنا نتقدم ونصبح اكثر تحضرا

أسست بلانويا عشان تكون منصة التعليم الصادق ومجتمع بيجمع الناس الي واخدا الحياة بجد الي داخل يعلم الناس بيديلهم كل حاجة يقدر يديها وصادق من جواه انه عاوز يفيدهم بجد والي داخل يتعلم بردو صادق مع نفسه انه عاوز يتعلم بجد وبيستفيد من كل الخدمات والامكانيات الي بنتيحهاله عشان يطور من نفسه بجد ويتقدم

هتلاحظو اني طول مانا بتكلم عن بلانويا بقول عاوزين نتعلم بجد وعاوزين نتعلم صح ودا للاسف كان رد فعل عفوي كدا من جوايا لما حسيت انه فعلا الناس مش واخدا الحوار بجد تحسهم كدا كلهم بيضحكوا على بعض الاساتذه بتمثل انهم بيعلموا والطلبة بتمثل انهم بيتعلموا مفيش حاجة بجد والأدهي بقا انه للاسف حتى التمثيل دا مش صح – مبنتعلمش صح

عشان كدا وانا بأسس بلانويا بحثت كتير جدا عن اساليب ونظريات التعليم الحديثة وقعدت كتير اقارن واحلل واجرب اية الي بينفع واية الي ممكن يكون كويس بشروط معينة واية الي لو اندمج مع اية يحقق فاعليه اكبر عشان في الاخر لما نيجي نعلم بجد واحنا صادقين فعلا من جوانا اننا عاوزين ندي كل حاجة – نديها صح تحقق هدفها فعلا

وفي أواخر 2017 وبدايات 2018 بدات الرحلة بقا مع بلانويا كشركة على ارض الواقع وبدا معاها بقا تحديات اي ستارت اب في بلدنا اللطيفة  بس النجاح في بلانويا كبيزنس كان من اهم الحاجات الي لازم تتحقق عشان نقدر نحقق الحلم ونستمر في تقديم الخدمات التعليمية بنفس الجوده الي بنحلم بيها لانه انتاج محتوى تعليمي متميز أمر مكلف – الحقيقة مكلف جدا

ولو معرفناش ننجح اننا ندفع للاساتذه المتميزين ما يقابل وقتهم ومجهودهم عشان ينتجولنا المادة العلمية دي بكفاءه عاليه مش هنقدر نستمر ونفضل نقدم هذا المستوى العالي من التعليم فكانت تحديات البيزنس كبيرة وصعبة ولكن بفضل الله تغلبنا على كتير منها ودلوقتي قادرين اننا نكمل ونحقق الحلم ومازلنا بنكبر يوم بعد يوم بدعمكم لينا ووقوفكم جنبنا

عاوز اشكر فعلا كل واحد آمن بينا وفينا وساعد التجربة دي انها تنجح وتكبر وتاكدو اننا كلنا مستفيدين بشكل أو بآخر لان وجود تعليم حقيقي جاد وفعال وسطنا هيساعدنا كلنا نتقدم ولو بشكل غير مباشر

فباذن الله الي جاي افضل بكتير 😍👍💪

الله الموفق والمستعان

Facebook

تواصل معنا عبر الفيسبوك

Instagram

تابعنا اعلى انستجرام

Youtube

اشترك في قناتنا على اليوتيوب

Blanoia 2019 © All rights reserved.