الفرق بين الفيراي والكورونا من الافضل ؟
مؤخرا بدأت المنافسة تزداد قوة بشكل كبيرة جدا بين محركات الرندر الملحقة بالماكس وبالاخص الفيراي والكورونا وبدأ الجدل عن مين الاقوى والاسهل والاسرع والابسط وهكذا وانقسم الناس على فرق مختلفة واحتدمت النقاشات على السوشيال ميديا وطبعا كالعادة اختلفت الآراء ووجهات النظر
في البوست دا هحاول ابسط ليكم مزايا وعيوب الفيراي والكورونا ونحاول نحدد ايه الانسب منهم لكل حالة من حالات الاستخدام المختلفة
اولا ايه هيا محركات الرندر ؟!
محركات الرندر هي برامج ملحقه ببرامج الرسم ثلاثية الابعاد ( الماكس _ الريفيت _ الاسكتش اب … )بتديله امكانيات اكتر من حيث الماتريال والاضاءات والإخراج النهائي للصور فهي تشتغل من جوا الماكس ولكنها تعتبر برامج منفصلة من شركات مختلفة بتنزل لوحدها بتتسطب لوحدها ويتم تفعيلها بردو بشكل منفصل ولكن بتشتغل من جوا البرامج الاساسيه نفسه
الماكس بيكون عنده نوع بردو من محركات الرندر الي بتيجي معاه وممكن يشتغل بيها بدون ما يحتاج اي برامج اضافية ولكن محركات الرندر دي بتديله امكانيات اكتر قوة أكبر وواقعية أفضل في المخرجات النهائية ودا بسبب وجود شركات متخصصة شغاله على تطوير المحركات دي وتحسينها باستمرار فبتخليها اقوى من البرنامج الي بيجي مع الماكس نفسه
وفي جميع الاحوال مجرد ما بتسطب اي برنامج من البرامج دي وتبدأ تتعامل بيه بتحس انه اصبح جزء من الماكس والتعامل معاه بيكون سلس ومفيش فيه اي مشاكل باذن الله
ايه هيا محركات الرندر الاكثر شهرة ؟!
- الفيراي - Vray
- الكورونا - Corona
بالنسبه للفيراي - Vray
مميزات الفيراي:
- متوافق مع مجموعة كبيرة جدا من برامج الرسم
- بيقدر يستخدم قوة كروت الشاشة في الرندر بجانب قوة المعالج
- مليان اوبشنز فتقدر تتحكم في كل حاجة
بالنسبه للكورونا - Corona
الكورونا من البرامج الجديدة نسبيا الي ظهر سنة 2012 ولكنه قدم تجربة متميزة جدا من جودة عالية وسرعة في الرندر بيقدر يشتغل مع برامج : الثري دي ماكس والسينما فور دي وطبعا مزود بكل الخصائص الي محتاجها عشان تطلع شغل متكامل بسهولة ولكنه بيشتغل مع المعالجات فقط ومش بيستغل قوة كروت الشاشة في الرندر النهائي
مميزات الكورونا:
- يقدر يطلع جودة عاليه في وقت اقل
- سهل في التعامل معاه وتعلمه
خلاصة الفرق بين الفيراي والكورونا :
الفيراي :
هو الكينج الكبير فيه قنوات كتير بتدعمه بألااف الدروس التعليمية والبلوكات الجاهزة للاستخدام ومكتبات الماتريالز وطبعا فيه كل الاوبشنز الي ممكن تحتاجها في السيناريوهات المختلفه ولو بتعرف تستخدمها كويس هتقدر تحقق سرعه رندر اعلى من الكورونا بسهولة هوا يعتبر معقد شوية اكتر من الكورونا ولكن دي ممكن تكون ميزة للناس المحترفين لانه بيديلهم امكانية اكبر للتحكم في كل حاجة. وطبعا دعمه لاستخدام قوة كروت الشاشه ممكن تديله ميزة تنافسيه اكبر في المستقبل وأخيرا فهوا يعتبر اغلى بكتير من الكورونا.
الكورونا :
اسرع في كتير من الحالات وابسط في التعامل ويقدر يطلعلك نتايج كويسة بدون تعقيدات كتير ولكنه طبعا يتفتقد لبعض الاوبشنز المتقدمة ولكنه بيتطورو بسرعه واعتقد هيقدرو يوفرو الاوبشنز دي قريبا ولكن طبعا هوا محدود جدا من ناحية البرامج الي تقدر تستخدمها معاه يعتبر رخيص نسبيا ولكنه بيحتاج اشتراك شهري مستمر متقدرش تشتريه مرة واحدة وخلاص زي الفيراي