بورتفوليو معماري – أهم أداة في التسويق لنفسك كـ مصمم معماري

لازم تفهم ان البورتفوليو بتاعك هوا الي بيصنفك لو كل شغلك واجهات يباه انت بتاع واجهات الناس لا اراديا هتربط بينك وبين شغل الواجهات – اي حد هيجيله شغلانة واجهة هيفكر فيك على طول لانك انت بتاع الواجهات
فلو انت عاوز كدا عاوز تتشاف انك بتاع الواجهات – اهتم بالواجهات خلي البورتفوليو بتاعك بيركز على الواجهات ونوع فيها بقا وحط افكار مختلفه واستايلات مختلفه من الواجهات

فتكون هيا دي استراتيجيتك انا بتاع واجهات او ممكن تقول – الانتريورز الكلاسيك دي غالية والناس بتحبها وبتكسب اكتر – فانا عاوز اتشاف اني انا بتاع الانتريورز الكلاسيك فبالتالي هتصمم وترتيب البورتفوليو بتاعك انه يركز على النوع دا من المشروعات المعمارية وهكذا
اختيارك للمشروعات الي هتعرضها وطريقة ترتيبهم وتجميعهم لازم تفهم انه بيوصل رساله عنك وعن طبيعه شغلك – ولازم تكون انت المتحكم في الرساله دي وتحاول انك ترسمها عن وعي باستخدام المشروعات الي هتعرضها

وممكن جدا يكون عندك اكتر من بورتفوليو بتستخدم كل واحد فيهم على حسب ظروف الموقف او الشغلانه المطلوبة
فلو جالك شغلانه لاند اسكيب مثلا هتبعت فيها بورتفوليو مختلف عن الي هتبعته لو المطلوب شغلانه انتريور

ودا مش معنا انه البورتفوليو بتاع اللاند اسكيب مش هيكون فيه شغل انتريور ولكن هنرجع تاني لطريقة عرض المشروعات وترتيبهم والتركيز على ايه، يعني ممكن مثلا متكونش محتاج تحط كل صور المشروعات بتاعت الانتريور وتكتفي بصورة واحدة من كل مشروع في حين انك هتستفيض في كل تفاصيل مشروعات اللاند اسكيب وهكذا

المهم تختار انت المشروعات والصور من كل مشروع وطريقة ترتيبهم وحجمهم في انك توصل الرسالة الي انت عاوزها توصل عشان تحقق الهدف من البورتفوليو