اهم البرامج الهندسية المعمارية لازم يتعلمها كل مهندس معماري في 2023

هنتكلم عن اهم برامج الهندسة المعمارية لازم تكون علي اطلاع بها في 2023، و السبب هو إنك تكون عارف ايه البرامج المناسبة اللي تشتغل عليها و ايه اللي هيفيدك،

وبالتالي هتوفر وقت كان ممكن تضيعه لو روحت اتعلمت برنامج غير مفيد بالنسبالك

هتعرف في اخر المقالة :

  • أهم البرامج المعمارية
  • الفروق بين برامج الهندسة المعمارية
  • تصنيف برامج الهندسة المعمارية
  • واهم البرامج الي لازم تتعلمها

و في الفيديو الجاي هتعرف الفرق بين البرامج الهندسية المعمارية و ازاي تختار البرنامج المعماري الافضل  و هتكون علي دراية بكل انواع البرامج الي انت بتحتاجها في الشغل و ازاي تختار منها الي يسهل عليك شغلك ويخليك متميز في المكان الي انت فيه و ازاي تتعلم كل واحد منهم .

البرامج الهندسية المعمارية تنقسم الي :

اهم البرامج الهندسية المعمارية لازم يتعلمها كل مهندس معماري في 2023

2d Drawing Software - برامج رسم ثنائي الابعاد

اول نوع من انواع البرامج هيا برامج الرسم التو دي
ودي الي بنستخدمها عامة في رسم البلانات والقطاعات واللاي اوت والرسومات التنفيذية واي رسومات تو دي عامة نحتاجها للمشروع

ودي اشهر برنامج فيها هو الاوتوكاد لا غنى عنه ابدا لانه الاقدم والاشهر في المجال ومازالت معظم المكاتب في مصر والوطن العربي بتشتغل بيه وهوا يعتبر كمان الاسهل في التعلم وحوالية كميونتي كبير بيدعم بعضه وهتلاقيله محتوى تعليمي كتير في كل حته

 

برنامج الاوتوكاد تابع لشركة اوتوديسك اللي عملت شوية حاجات مؤخرا ممكن بعض الناس تشوفها ميزة او عيب

 هيا انها حطت في البرامج بتاعتها اوبشنز من كل البرامج بتاعتها


يعني الاوتوكاد بيرسم تو دي – بدات تضيفله حاجات ثري دي وحاجات بيلدنج انفورميشن مودلينج وهنفهم يعني اية بيم كمان شوية
يمعنى انه بأه برنامج متكامل – بس انا منصحش انك تستخدمه في كل حاجة – خليك مركز مع الكاد على انه تو دي فقط – لان امكاناياته في الثري دي والحاجات التانية قليلية جدا مش زي ما تستخدم فيها برنامج متخصص

 

نيجي بأه لكينج برامج التو دي – برنامج الريفت
هوا صحيح من اقوى برامج الرسم التو دي – الا انه انتشر حاليا اشاعات كتير مش حقيقية – على رأسهم اسطورة انك بترسم التو دي وبيطلعلك الثري دي اوتوماتيك والموضوع مش حقيقي بالمرة هيا كل الفكرة فيه انه بيرسم العناصر المعمارية بشكل مباشر – بمعنى انه عشان ترسم حيطة دابل لاين – بدل ما ترسم الخط الاولاني وبعدين تعمل الخط التاني الي بيمثل السمك
لا انت بتقوله ارسملي حيطة وبتطلع دابل لاين مرة واحدة لما تيجي ترسم باب مثلا – بردو بدل ما ترسم ضلفة الباب وبعدين دايرة الفتح – بتقوله حطلي باب هنا وهوا بيرسملك كل تفاصيله اوتوماتيك
فطبعا بيسهلك الرسم والتعديل بشكل كبير جدا – وطبعا عشان الريفت كمان اوتوديسك – فهتلاقي نفس

 

الاوبشنز دي بردو موجود في الاوتوكاد بس الي بيميز الريفت هوا البيلدينج انفورميشنز مودلينج
ودا انك بتعمل تسجيل لكل المعلومات المتاحة عن المبنى دا من اول طبعا الرسومات بتاعته ومواصفات العناصر الي انت استخدمتها وهوا بيطلعلك بأه جداول الكميات والتكلفة والجدول الزمني وجميع مراحل المشروع من اول التصميم لحد التنفيذ والتشغيل وحتى بعد هدم المبنى واعادة استخدامة – فبيباه موديل لجميع المعلومات المتاحة عن المبنى ودا بيفيد في حاجة اسمها الانتجريدد ديزاين
وهو ان كل التخصصات الي بتشتغل في المبنى بيشتغلو على ملف واحد بيحلطو كل تصميماتهم عليه فيقدرو ينسقو بينهم بشكل افضل ويقللو تكلفة المشروع بشكل كبير
زي مدني وكهربا وميكانيكا واي حد هيشتغل في المبنى

 

زي ما هو واضح الاستخدام الرئيسي للريفت مش هيفيدنا اوي واحنا بندرس العمارة ولكن بدات تظهر مكاتب كتير في مصر والوطن العربي بتطلب معمارين بيعرفو يشتغلو ريفت فلازم فعلا تكون عندك خلفيه عنه دا غير انه كمان بيساعد في الرسم بشكل كبير
ولكن متنساش انه مازالت الاغلبية العظمى شغاله بالاوتوكاد

 

وهنا لازم ننبهك انه لازم تكون شغال بنفس البرامج الي شغال بيها المجتمع الي حواليك مينفعش تشتغل مع نفسك كدا ببرنامج مهما كان عظيم ومتميز وافضل ميت مرة لانك في الاخر مش هتعرف تشتغل بيه لانه مش مطلوب وحتى اثناء الدراسة لسا مش هتعرف لا حد يساعدك ولا تساعد حد ولا حد يكمل على شغلك ولا انت تكمل على شغل حد

ودا الي حصل معايا في مشروع التخرج ،انا كنت دول فترة الدراسة بشتغل على برنامج اركي كاد ودا البرنامج التالت الي عاوز اكلمكم عنه – البرنامج دا كان هوا السباق في فكرة رسم الحوائط مرة واحدة والابواب والشبابيك بكلكاية واحدة – اياميها مكانش لسا الريفت ظهر على الساحة
فكنت بخلص بلانات كاملة في وقت قليل جدا بس قابلتني المشكلة بأه في مشروع التخرج لان مشروعي كان كبير جدا وكنت محتاج حد من زمايلي الصغيرين يساعدني في تبييض البلانات فاكتشفت ان كل الي حواليا بيشتغلو اوتوكاد ومكانش فيه ولا واحد يقدر يشتغل على فايلات الاركي كاد الي كنت عاملها ،فاضطريت وانا في رابعة وفي مشروع التخرج اني احول للاوتوكاد طبعا كنت بعرف اشتغل عليه – بس فضلت 4 سنين كاملين بشتغل على برنامج تاني

 

وهنا اهمية انك تبأه بتعرف تشتغل على برامج كتير مع بعض – هتحتاجهم بس مهم جدا انك تتقن البرامج الي كل الي حواليك شغالين عليها في الداسة وفي السوق الي هتطلع تشتغل فيه 

3d Drawing Software - برامج رسم ثلاثي الابعاد

وطبعا الكينج بتاعهم كلهم هو برنامج الثري دي ماكس برنامج الماكس هو اشهر برنامج رسم ثري دي مستخدم في مصر والوطن العربي الماكس على عكس المشهور عنه هو برنامج سهل جدا كل مشكلته ان ادواته كتير حبتين تحتاج وانت بتدرسة انك تركز شوية وتطبق كتير جدا عشان تفضل فاكرهم وتعرف ازاي تستخدمهم لكن انت لو جيت ىمسكت كل اداة لوحدها – هتلاقيها سهله جدا في حد ذاتها كل الحكاية انك تركز فية شوية في الاول وتطبق كتير هتلاقي الموضوع سهل جدا باذن الله

 

من اهم مميزات الماكس – انك تقدر تعمل فيه اي حاجة تخطر على بالك مهما كانت ويمكن من اهم مصادر قوته ان ليه لغة برمجة خاصة بيه خلت المبرمجين يعملوله برامج مختلفة كتير بتضيف لية امكانيات كتير بتساعدك انت تنفذ شغلك باسهل واسرع طريقة ممكنه

وكمان حوالية بردو كميونيتي كبير جدا عملو كتير من الحاجات الي الناس بتستخدمها باستمرار وبقت موجدوة لكل الناس تقدر تستخدمها بشكل جاهز – فمعدتش مضطر تعمل كل حاجة فيه من الاول – هتلاقي حاجات كتير جاهزة تقدر تستخدمها على طول

 

تاني برنامج هو المايا و برده من شركة اوتوديسك و هتلاقيه بردو فيه شبه كبير بينه وبين الماكس كل الحكاية في الفرق بينهم في تكنيك بناء المجسمات جوا البرنامجين

في الماكس بيستخدم طريقة اسمها البولي مودلينج ودي طريقة بتعتمد على ان الماكس يقسم اي مجسم لمجموعة الاسطح الصغيرة الي بيتكون منها ويقسم السطح لمجموعة خطوط والخط لمجموعة نقط وهكذا

اما المايا بيفهم المجسمات جواه عن طريق المعدالات الرياضية الي بتكون الخطوط بتاعته ومنها يبدأ يعمل الاسطح المختلفة الي بتربط بين الخطوط دي يعني بيشتغل بطريقة رياضية شوية

طبعا دا في خلفية عمل البرنامج لكن وانت بتتعامل معاهم مش هتحس بالحكاية دي اوي ولكن فيه طبعا اختلافات كتير في طريقة بناء النماذج جوا البرنامجين

 

خلاصة الموضوع الاتنين يقدروا يعملو كل حاجة ممكن تيجي في بالك او تشوفها في اي حته وكل واحد ممكن يكون اسهل في حته معينة

ولكن المرجعية النهائية هتكون لاية الي بيستخدم بكثرة حواليك ايه الي هتلاقيلة مواد تعليمية بسهوله وكميونيتي يقدر يدعمك ويساعدك اكتر

كتير جدا شوفت ناس بتشتغل على المايا في بعض الحاجات وترجع تفنش على الماكس عشان مفيش ريسورسز كافية في المايا في عملية التفنيش دي

 

نيجي بعد كدا لبرنامج الاسكتش اب هو يعتبر اسهل واحد فيهم – بس مشكلته انه محدود جدا فانا شخصيا منصحش بيه خالص برغم سهولته – الافضل تبدأ ماكس وتتطور فيه مع الوقت – احسن ما تضيع وقت في برنامج ليه سقف وهتضطر في يوم من الايام تسيبه بردو وتروح تتعلم ماكس

شوفت كتير من الناس الي اتعلمته اصلا في الاول قابلو صعوبة كبيرة في التحول للماكس – لانه خلاص دماغة اتبرمجت بطريقة معينة وتسلسل شغل معين هيبأه صعب يغيرة وبلاقيهم في وسط شغلهم بالماكس يسيبوه ويروحو يعملو حاجات على الاسكتش اب على الرغم انها سهله جدا في الماكس ولكن عشان هما اتعودو على كدا وبعدين يرجعو يدخلوها على المكس عشان يفنشوا

 

واخيرا في فئة برامج الثري دي عندنا برنامج الراينتو الجراسهوبر

الراينو هو برنامج ثري دي عادي بردو زي الماكس والمايا – ولكن بيظهر تميزه لما تبدا تضيف عليه برنامج الجراسهوبر الاتنين بيشتغلو مع بعض ويدولنا مجموعة ادوات للبارامترك ديزاين بمعنى انك بتبني المجسم بتاعك كله عن طريق معادلات رياضية تقدر تتحكم فيها بمعنى انك لوغيرت رقم فيها بيتغير المبنى كله معاك فعلا فيه خطا شائع عن البارامترك ديزاين انه هوا الي بيخرج المباني الي فيها تكراريات كتير او باترن باشكال مختلفه والحقيقية ان مفيش علاقة مباشرة بينهم

 

ممكن البارامترك ديزاين يطلع مبنى بالشكل دا وممكن بردو يطلع مبنى عادي جدا الفكرة كلها ان وانت بتعمل ديزاين واكتشفت ان فيه حاجة اتغيرت في المعطيات بتاعتك وعاوز تغير المبنى طبقا ليها مش بتحتاج تروح تعمله من الاول – لا بتغير المعطى دا في المعادلة بتاعته فبيتغير تصميم المبنى كله بمجرد التغيير في الرقم دا بس

 

وطبعا ليه تطبقات كتير زي انه مثلا تربط التغير دا بمحاكاة للتأثير البيئئ على المبنى وشدة الاضاءاة والتهوية وحاجات تانية كتير

 

ودا يعتبر مستوي متقدم شوية وبردو مش مطلوب خالص في السوق بتاعنا ولكنه يعتبر مدخل كويس للمسابقات والدراسات المعمارية المتقدمة

Rendering Engine - برامج اخراج نهائي للصور

هتحتاج برامج عمل رندر للمناظير اللي طلعت يعني هتحتاج تديها حاجات زي الماتريلز و الاضاءات و تخرج الصورة النهائية بتاعتها

و هتلاقي برامج محركات رندر زي ليمون او فيري او كورونا او ارنولد

– ظهر مؤخرا برنامج اللوميون و فكرته انه يسهل على الناس التفنيش النهائي للصور بيشتغل بطريقة الفيديو جيمز – انه الافكتات الرئيسية زي الاضاءات والماتريالز والبيئة المحيطة بتكون معمولة بالكامل مسبقا وتقدر انت تستخدمها على طول زي نظام الالعاب انت بتدخل لعبة الجرافيك بتاعها بيكون معمول قبل كدا وبتتمشى انت جواها ممكن تبص في اتجاه بيطلعلك صورة معينة تبص في الاتجاه الناني بتتطلعلك صورة تانية وهكذا

فكرة اللوميون انك بتعمل المجسم ثلاثي الابعاد على برنامج خارجي زي الماكس او المايا او الاسكتش اب وبعد كدا بتدخله عىل اللوميون وتحط من خلاله ماتريالز جاهزة وتختار بيئة محيطة جاهزة وحتى سيناريو اضاءات جاهزة
وتبدأ تطلع صور على طول

 

عملية الاخراج النهائي دي بتكون معظمها على كارت الشاشة في الجهاز وللاسف معظم كروت الشاشة في اجهزتنا تعبانه على عكس باقي البرامج الي بتركز شغلها على الرامات والبروسيسور تاني حاجة ان المخرج النهائي مش بيكون واقعي اوي – بيكون كرتوني كدا شبة الالعاب فمتقدرش تناقش مع نتايج الفيراي مثلا في الثري دي ماكس الي بتطلع واقعية تماما لدرجة ممكن متقدرش تفرقها عن الحقيقة

Photo Editing Software - برامج تعديل على الصور

اما بقا اخر نوع من انواع البرامج الي بنحتاجها و هيا برامج البريزنتيشن – او برامج الاخراج النهائي الي بنفنش بيه الشغل بتاعنا عشان نبدا نعرضه على العميل بتاعنا او على الدكتور في المناقشة

 

وطبعا اهم برنامج في القصة دي هوا برنامج الفوتوشوب الفوتوشوب بنستخدمه في تظبيط اللقطات الي بتطلع من كل برامج الثري دي الي اتكلمنا عنهم ونادرا جدا لو فية لقطة طلعت ومعدتش على الفوتوشوب قبل ما تتسلم – الفوتوشوب هو جزء اساسي من البروسيس عشان تطلع لقطة متكاملة 100%

بعد كدا بنستخدم كمان في عمل تجميعه للمشروع وهوا انك تعمل لوحة كبيرة وتحط عليها الصور بتاعتك والاسكتشات والتكست بتاعك وتظهرهم كلهم بشكل متناسق وجذاب يظهر المشروع فعلا بشكل كويس ويلفت انتباه اي حد يبص عليه

ودي خطة مهمة جدا وهتحتاجها كتير جدا في مواد كتير وانت بتدرس وكتير جدا في الشغل بعد ما تخلص

 

تاني برنامج نقدر نستخدمه في الموضوع دا هو برنامج ادوب الليستراتور وهو بيعمل تقريبا نفس الي تقدر تعمله بالفوتوشوب بس هوا بيستغل بطريقة مختلفة اسمها Vector Based graphics ودي معناها انه بردو الاشكال والصور الي بتدخل جواه بتتحسب كلها بمعادلات رياضية ودا معنها انك مهما كبرتها او مش بتبكسل معاك

 

ولكن لازم نبقا فاهمين انه اصلا الصور الي بتخرج من برامج الثري دي مش بتبقا فيكتور ،بتكون بيكسل يعني بنفس الطريقة الي بيشتغل بيها الفوتوشوب وعشان كدا الفوتوشوب هو الافضل في التعديل عليها والتعامل معاها

الملخص

اتكلمنا باستفاضة في هذا الدرس عن اهم البرامج المعمارية و تصنيفاتهم زي الماكس المعماري والريفيت والاسكتش اب والكاد والفوتوشوب واللوميون والراينو والجراسهوبر

و ديه تعتبر البرامج الاساسية اللي هتحتاجها بمعني انك ممكن تستخدمهم معاهم ادوات تانية و اضافات او بلاجنز عشان تسهل عليك شغلك و تنفذه بشكل أسرع

لو عاوز تعرف اكتر عن كورس البداية الصح في الماكس المعماري

كورس البداية الصح في الماكس المعماري