ليه إتقان ثري دي ماكس لوحده مش كفاية؟
ليه برنامج ثري دي ماكس مهما أتقنته و عرفت كل الادوات اللي فيه وعرفت تعمل كل الحاجات اللي انت عايزها، ده برده مش كفاية انك تطلع شغل متميز و احترافي
ليه لازم تتعلم معاه حاجات تانية افكار و مفاهيم جديدة
البلوج بوست هيعرفك الأسباب و إزاي تعالجها و ايه هيفضل نقصك و محتاج تكمله مع مع معرفتك بأدوات الماكس
معايير الجمال
يعني أن احنا نقول علي الحاجة ديه جميلة !
كونك أنك تشوف صورة أو عمل فني و تقول عليه جميل، يعتبر أحساس إنك بتحسه جواك و بما أنه احساس فهو تجربة شخصية بتختلف من شخص للاخر.
كل واحد بيحس العمل الفني بطريقته هو، كل واحد مختلف عن التاني عشان كده بنقول أن الجمال نسبي فممكن شخص يشوف عمل جميل جدا و شخص تاني يشوف نفس العمل مش حلو.
ازاي نقدر نحط قواعد عامه للجمال ؟
دلوقتي إحنا محتاجين نسأل نفسنا ازاي نقدر نحط قواعد عامة للجمال عشان نمشي عليها و كلنا نتفق علي أنها جميلة.
و هنا إحنا نقدر نستند إلي الجمال المطلق و هو الجمال المأخوذ من الطبيعة و عناصرها. و بكده لازم نحلل و نفهم معايير الجمال المطلق اللي هي معايير الطبيعية المخلوقة حوالينا و نقدر نستبط منها معايير الجمال.
و لازم تكون فاهم أن الماكس مجرد أداه زي القلم الرصاص و أنت عايز ترسم شجرة و معرفتك باستخدام القلم الرصاص بس مش هيكون كافي إنك ترسم الشجرة بمعني أنه مش كافي أنك تعرف أزاي تستخدم القلم لازم تعرف برده إزاي ترسم الشجرة و تكون عارف ايه المعايير اللي لازم تعملها و تطبقها علي الشجرة عشان توصل لمرحلة الجمال المطلق.
و بنفس الطريقة دي استطاع باحثين و فنانين كتير يطلعوا بمعايير مشتركة اللي موجودة في كتير من المخلوقات و العناصر في الطبيعة و تم تصنفها بمعايير الجمال
يعني لو طبقتها علي عمل فني فيعتبر بانه جميل و متميز. و المعايير ديه مش قاعدة او لها عدد معين انت محكوم بيه بمعني انت تقدر تستنبط و تطلع بمعايير كتير جدا و متنوعة حسب مجهودك و بحثك.
و لكن هنذكر هنا المعايير الأكثر شيوعا و الأكثر وضوحاً و الأكثر إستخداماً.
و لكن هنذكر هنا المعايير الأكثر شيوعا و الأكثر وضوحاً و الأكثر إستخداماً.
المعايير اللي لازم نطبقها؟
- البساطة
- الإتزان
- التناغم
- التضاد
- الوحده
- الحركه
- النمط
كل المعايير المذكورة تعتبر معايير عامة يعني مجموعة من المبأدي عايزين نحقهها في العمل الفني و عشان نحقق المبأدي و المعايير المذكورة في الثري دي ماكس بنستخدم مجموعة من الأدوات و العناصر في الماكس عشان نحققها و نطلع بالصورة النهائية.
3 ادوات رئيسية بتساهم في انتاج الصورة بتاعتنافي ثري دي ماكس
1- المجسمات
المجسمات هي كل العناصر الموجودة في المشهد و نقدر نستخدم اشكالها او احجامها و أماكن توزعهم و استخدام الفراغات في عمل المعايير الجمالية
فنقدر نحقق الاتزان أو تضاد أو غيرهم من المعايير الجمالية.
2- الاضائات
نقدر نستخدم الاضاءات و نتحكم في أماكنها و ألوانها و درجة سطوعها عشان نطلع الاحساس العام اللي بيوصلنا من خلال المشهد النهائي و نوصل إحساس معين بمعايير معينة و يستقبله الناس علي أنه عمل فني جميل.
3- الماتريالز
يمكن إستخدام الماتريالز لعمل إتزان أو تضاد عن طريق نعمل لون غامق قصاد لون فاتح او ماتريال خشن قصاد ماتريال ناعم و نندمج و نشكل براحتنا بالعناصر عشان نوصل لمعايير الجمال بتاعتنا
و لكن لازم نفهم كويس جدا أن الماكس مجرد أداه للرسم ، بترسم تصميم أو بترسم فكرة أو حاجة من الطبيعة و الحاجة ديه هي غالبا موجودة في صورة إسكتشات او مجموعة من الرسومات و أنت عايز تعملها ثري دي . فالحاجة ديه بتتكون من عناصر موجودة بالفعل من قبل ما تتحول لثري دي في الماكس و ده معناه أن تطبيقك للمعايير الجمالية مقيد بالعناصر التصميمية الموجودة أصلا في التصميم.
و هنا يجي دور اختيار الزاوية التصويرية و اللي من أهم الخطوات في الثري دي لان لو حتي الصورة مش حلوة اوي تقدر تبصلها من زواية تانية تخليها تبان حلوة و ديه حاجة مهمة جوه الماكس بأنك تدور علي مواطن الجمال في المشهد بتاعك في ثري دي ماكس.
الملخص
العملية الإبداعية مش عملية خطية انت هتعمل عنصر و ترجع خطوة لوراء عشان ترجع تضيف او تعدل أي عنصر فمش هتمشي خطوة بخطوة انت هتطلع خطوة لقدام و ترجع تاني و هكذا لغاية ما تظبط الصورة علي المعيار الجمالي اللي عايز توصله.
و هنا لازم تكتسب القدرة علي نقد الشغل بناء علي معايير و أسس صحيحة و تعرف ايه اللي ناقصه و ايه اللي ممكن يطور فيه و هتلاقي نفسك بتعمل شغل محترف في ثري دي ماكس.
