هنتكلم عن إسكربيت مهم جدا في تسريع الرندر في 3d max بشكل كبير.
الاسكربيت ده إسمه VMC أو Vray Material Control. الاسكربيت دوره أن هو بيتحكم في Subdivs بتاعت أي فيراي ماتريال سواء الماتريال دي موجودة عندك في الماتريال ايديتور أو موجودة عندك في أي مجسم أنت ضيفه أو سواء المجسم ده أنت اللي عمله أو ضيفه بلوك جاهز.
تأثير Subdivis علي تسريع الرندر في 3d max
موضوع ال Subdivs بيأثر بشكل كبير علي جودة الرندر و في نفس الوقت علي عملية تسريع الرندر في 3d max.
ساعات بنشوف أرقام كبيرة جدا في ال Subdivs بتأثر بشكل سلبي علي سرعة الرندر و لكن في النهاية مش بتزود كتير من جودة الرندر و ده بيحصل كتير بالأخص في البلوكات اللي إحنا مدخلنها عشان بتبقي معمولة عن طريق أجهزة في الخارج إمكانياتها عالية و بيقدروا من خلالها يعملوا رندر براحتهم لعدد كبير من ال Subdivs من غير مشاكل و لكن عندنا لما بنستخدم البلوكات ديه، بتبقي قاتلة بالنسبة لنا عشان للأسف أغلب الأجهزة اللي عندنا إمكانياتها ضعيفة.
المهم الفكرة بالنسبة لينا أننا نقلل ال Subdivs اللي موجودة في المشهد كله مرة واحدة عشان نقدر نعمل رندر بسهولة.
و حاجة كمان مهمة لازم نأخدها في الأعتبار و هي أن ال Subdivs لما تقل اوي بتعمل Noise في المشهد خاصة في الماتريلز اللي بيكون فيها ريفلكشن او حاجات زي كده.
ال Noise ديه إحنا نقدر نحل مشكلتها عن طريق Vray DeNoiser. لذلك إحنا بنفضل VMC سكربيت لاننا بنقدر نقلل ال Subdivs اوي فبنزود سرعة الرندر بشكل كبير و ال Noise اللي بتطلع بنقدر نعالجها عن طريق Vray DeNoiser فنقدر نطلع جودة كويسة جدا بدون وقت كتير في الرندر.
فأحنا لازم نتعلم الاسكربيت و نفهمه بشكل كويس جدا و لازم نعمله قبل كل رندر يعني لا غني عنه إبدا في تسريع الرندر في 3d max.
طريقة عمل الأسكريبت
عشان نحمل الاسكريبت و نشغله، هنخش علي قائمة Scritping و نضغط علي Run اسكريبت و نختار الفايل بتاع الاسكريبت و تقدر تحمل اسكريبت تسريع الرندر في 3d max من هنا.
هتظهر شاشة الاسكريبت و كل اللي محتاجين نعمله، في قسم Global Subdivs Presets و هنا تقدر تعدل عدد ال Subdivs الكلية الموجودة في المشهد كله.
فأنت لو مثلا خليت القيمة 6 و ضغطت علي Scene، هتلاقي علي طول كل ال Subdivs اللي في المشهد بتاعك 6.
أنت طبعا أقصي رقم محتاج تعمله هو 6 مع وجود Denoiser عشان يشيل ال Noise اللي هتكون موجودة بسبب تقليل ال Subdivs.
بالنسبة لل Denoiser هنجيبه طبعا من إعدادات الرندر اللي هي Render Setup و نروح ل Render Element و نعمل ADD و هنلاقي Vray DeNoiser. بس ال Vray DeNoiser مش بيشتغل إلا بعد ما تعمل الأعدادات بتاعتك خالص اللي هي إعدادات الرندر العادية و تعمل تجربة رندر الأول و بعد كده ترجع ل Render Element و تحدد ال Vray DeNoiser و تنزل تحت و تضغط Update. عشان يعمل تحديث علي حسب الأعدادات اللي أنت حددتها. و بكده ال Vray DeNoiser بتاعك هيشتغل.
عمل اختصار للأسكريبت
فيه كمان طريقة ممتاز هتوفر عليك وقت كبير بدل ما تقعد تعمل كل الخطوات ديه عشان تشغل الاسكريبت. الطريقة هتساعدك تشغل الأسكربيت من خلال ضغطة زر واحد فقط.
نروح علي قايمة Customize و نختار Customize User Interface و بدخل علي Tool Bars و هنختار و نحدد من قايمة Actions كلمة VMC و نسحبه و نرميه في مستطيل Quick Tool Bar Access.
و بعدها هيظهرلك زرار فوق و اللي هو VMC و دلوقتي تقدر تفتح الاسكربيت بمنتهي السهولة.
الملخص
دلوقتي انت عرفت طريقه فعاله جدا في تسريع الرندر في 3d max بدون التأثير علي جودة المشهد بأستخدام الاسكربت الجبار VMC. كل اللي عليك انك تطبق اللي الخطوات اللي اتعلمتها و كمان ممكن تتعمق اكتر و تعرف كل حاجه عن الاسكربت في كورس كامل علي اسكربيت CMC في برنامج تأسيس المعماريين المقدم من بلانويا.
